തിങ്കളാഴ്‌ച, നവംബർ 06, 2006

അമേരിക്കയെ കാത്തിരിക്കുന്നത്...

നിങ്ങള്‍ക്കെന്നെ കൊല്ലാം, പക്ഷേ തോല്പിക്കാനാകില്ല!
സദാം ഹുസൈനെതിരെയുള്ള വിധി നാമെല്ലാവരും പ്രതീക്ഷിച്ചതു തന്നെ, കാരണം ബുഷിന്റെ വാലാട്ടിപ്പട്ടികളായ ജഡ്ജിയും ഉദ്യോഗസ്ഥരും..ബുഷ് നിയമിച്ച ഭരണകൂടം.പിന്നെയെന്തെല്ലാം?

അല്ലെങ്കില്‍ തന്നെ 2002 ല്‍ ഒരു കാരണവുമില്ലാതെ ഐക്യരാഷ്ട്രസഭയേക്കാള്‍ വളര്‍ന്നു വന്ന അഹങ്കാരത്തിന്റെ മൂര്‍ത്തീരൂപമായ അമേരിക്യന്‍ ഐക്യനാടുകള്‍ എന്തിണായിരുന്നു ഇറാഖിനെ ആക്രമിച്ചത്? മാരകമായ ആയുധശേഖരങ്ങളുള്ള ഇറാഖ് ലോകസമാധാനത്തിനു ഭീഷണിയാണെന്ന കാരണത്താലോ? സ്വന്തം എണ്ണപ്പാടത്തെ എണ്ണ ചോര്‍ത്തിയ കുവൈറ്റിനെ ആക്രമിച്ചതിനോ? എങ്കില്‍ അതിര്‍ത്തിയില്‍ പ്രശ്നങ്ങളുണ്ടാക്കുന്ന പാകിസ്ഥാനെ ആക്രമിച്ചാല്‍ ഇന്ത്യയുടേയും ഗതി ഇതായിരിക്കുമോ?

ഏതൊരാത്മാഭിമാനമുള്ള ഒരു ഭരണാധികാരിയും ചെയ്യുന്നതേ സദാമും ചെയ്തുള്ളൂ. ഇറാഖിജനതയെ അരുംകൊല ചെയ്തുവെന്നവകാശപ്പെടുന്ന ബുഷ് ഭരണകുടം യഥാര്‍ഥത്തില്‍ സദാം ഇറാഖിനു വേണ്ടി എന്തു ചെയ്തോ അതിനെയെല്ലാം മറച്ചു വയ്ക്കുകയും നശിപ്പിക്കുകയും ചെയ്തു? ലോകസമാധാനത്തിനെന്ന പേരില്‍ അമേരിക്ക കൂട്ടക്കൊല ചെയ്ത 10 ലക്ഷത്തോളം ജീവന് ആര് കേസെടുക്കും? ഏതു ജഡ്ജി വിധി പ്രസ്താവിക്കും? ആധുനിക ഇറാഖിന്റെ ശില്പി എന്നറിയപ്പെടുന്ന സദാമിനെ സ്വന്തം മാധ്യമങ്ങളുപയോഗിച്ച് അമേരിക്ക പ്രതിച്ചായ തകര്‍ക്കുകയായിരുന്നില്ലേ?

സദാമിന്റെ കാലത്തുണ്ടായ വന്‍ സാമൂഹ്യമാറ്റത്തെക്കുറിച്ചും വികസനത്തെക്കുറിച്ചും ആരും ഒന്നും മിണ്ടുന്നില്ല. എണ്ണവ്യവസായത്തെ ദേശസാല്‍ക്കരിച്ച്തുമൂലം സായിപ്പിന് ലോകത്തിലെ രണ്ടാമത്തെ വലിയ എണ്ണശക്തിയില്‍ ആധിപത്യം കുറഞ്ഞുതുടങ്ങിയപ്പോള്‍ ആ രാജ്യത്തെ പട്ടിണിയാണ് മാറിയത്. ആ എണ്ണപ്പണം ഉപയോഗിച്ചത് ആശുപത്രികളും സ്ക്കൂളുകളും പണിയാനായിരുന്നു. നിര്‍ബന്ധിതവും സാര്‍വത്രികവുമായ വിദ്യാഭ്യാസം നടപ്പിലാക്കിയ സദാം ഉന്നത തലം വരെ സൌജന്യ വിദ്യാഭ്യാസവും ഏര്‍പ്പെടുത്തി.അറബ് ലോകത്തെ ഏറ്റവും സാക്ഷരസമൂഹമാക്കി ഇറാഖിനെ മാറ്റിയ സദാം സ്ത്രീകള്‍ക്ക് ഉന്നത ഉദ്യോഗങ്ങളിലും മറ്റും ജോലി നല്‍കുകയും ചെയ്തു. ആധുനികതയെയും ശാസ്ത്രത്തേയും കൂട്ടിയിണക്കി രാജ്യത്തെ പുരോഗതിയിലേയ്ക്ക് നയിച്ച സദാം പരസ്പരം ചോരകുടിച്ചുകൊണ്ടിരുന്ന ഗോത്രങ്ങളെ ഒരുമിപ്പിക്കുകയും ചെയ്തു.

അമേരിക്ക പരിശീലിപ്പിച്ച ന്യായാധിപരും, പിന്നെ അമേരിക്കന്‍ പൌരന്മാര്‍ നികുതിയായി നല്‍കിയ 750 ദശലക്ഷം ഡോളറുമാണ് ഈ വിചാരണ നാടകത്തിനായി ഉപയോഗിച്ചത്.ബുഷ് ഭരണകൂടം ചതിയിലുടെയും ഒടുങ്ങാത്ത നരഹത്യയിലൂടെയും നേടിയെടുത്തെ ഇറാഖ് അധിനിവേശത്തെ ന്യായീകരിക്കാന്‍ വേണ്ടി മാത്രമാണ് ഇങ്ങിനെയൊരു നാടകം.ന്യായം എന്ന വാക്കുച്ചരിച്ച ന്യായാധിപരെ മാറ്റിയും, പ്രതിക്കു വേണ്ടി വാദിച്ച വക്കീലന്മാരെ വധിച്ച്ചും അമേരിക്ക തങ്ങളുടെ നയം വ്യക്തമാക്കിക്കൊണ്ടിരുന്നു.ജപ്പാനില്‍ അണുബോംബിട്ട് ലക്ഷങ്ങളെ വധിച്ച അമേരിക്ക, ലോകമെമ്പാടും നിരപരാധികളെ കൊന്നൊടുക്കുക്കൊണ്ട് സാമ്രാജ്യത്ത അധിനിവേശത്തിന്റെ ശംഖൊലിമുഴക്കുന്ന ഈ കാപാലികര്‍ക്ക് ധാര്‍മ്മികമായി എന്തവകാശമാണുള്ളത്?

ഉന്നം സദാം മാത്രമോ?


ജീവിച്ചിരിക്കുന്ന സദാമിനേക്കാള്‍ ആയിരം മടങ്ങ് ശക്തനായിരിക്കും തൂക്കിലേറ്റപ്പെട്ട സദാം എന്ന് കാലമവര്‍ക്ക് മനസ്സിലാക്കിക്കൊടുക്കും.ആയുധ ശക്തികൊണ്ടോ സാമ്പത്തിക ശേഷികൊണ്ടോ ഈ ജനരോഷത്തെ തടയിടാന്‍ ഒരു പൈശാചിക ശക്തിക്കുമാകില്ല.

ഈ വിധി ക്രൂരമാണ്..പൈശാചികമാണ്...നീതിയേയും നിയമത്തേയും കാറ്റില്‍പ്പറത്തുന്നതാണ്....യഥാര്‍ഥത്തില്‍ അറബ് അധിനിവേശത്തിന് കാത്തിരുന്ന അമേരിക്കയുടെ കയ്യില്‍ കിട്ടിയ വടിയായിരുന്നു സദാമിന്റെ കുവൈറ്റ് ആക്രമണം എന്ന സാഹസം.ഒരര്‍ത്ഥത്തില്‍ അമേരിക്കതന്നെയാണ് ആ യുദ്ധത്തിനും കാരണക്കാര്‍. കുവൈറ്റില്‍ ഇടപെട്ട അമേരിക്ക അന്നുമുതല്‍ ഗള്‍ഫ് ലോകത്തിന്റെ തന്നെ നിയന്ത്രണം ഏറ്റേടുക്കുകയായിരുന്നു.അധിനിവേശത്തിനു ശേഷവും ഒരു വിനാശകാരിയായ ആയുധം പോലും ഇറാഖില്‍ നിന്ന് കണ്ടെടുക്കാന്‍ അക്രമികള്‍ക്കായില്ല.. പരിഹാസ്യരായ ബുഷിനേയും കൂട്ടരേയും കാത്തിരിക്കുന്നത് മറ്റൊരു വിയറ്റ്നാം ആണ്.

സ്വന്തം നാടിനും നേതാവിനും വേണ്ടി മരിക്കാന്‍ തയ്യാറുള്ളവര്‍ പ്രതികാരം തുടരുമ്പോള്‍ അവിടേയും പൊലിയുന്നത് ആയിരങ്ങളായിരിക്കും.അതിന് അമേരിക്കനെന്നോ ബ്രിട്ടീഷ് എന്നോ ഉള്ള വത്യാസമുണ്ടാവില്ല...

കത്തുന്ന പ്രധിഷേധം

അവലംബം: ദേശാഭിമാനി ദിനപ്പത്രം

8 അഭിപ്രായങ്ങൾ:

  1. എനിക്കു പറയാതിരിക്കാനാവുന്നില്ല?
    വിചാരണയെന്ന പ്രഹസനവുമായി ഒരു സ്വത്ന്ത്ര പരമാധികാര രാഷ്ട്രം ആക്രമിക്കുകയും രാഷ്ട്രത്തലവനെ തൂക്കിലേറ്റാനും അമേരിക്ക ആരാണ്?
    ഇങ്ങനെയെങ്കിലും പ്രതികരിച്ചില്ലെങ്കില്‍.....

    മറുപടിഇല്ലാതാക്കൂ
  2. നല്ല പ്രതികരണം..
    ഒരു രാജ്യത്തെ ജനത 99% വോട്ടു ചെയ്ത് വിജയിപ്പിച്ച ഭരണാധികാരി ഒരു വശത്ത്..
    ഒരു രാജ്യത്ത് വോട്ടെടുപ്പ് കഴിഞ്ഞപ്പോ, തോറ്റോ ജയിച്ചോ എന്നു പോലും അറിയാതെ 3 മാസം കഴിച്ചു കൂട്ടിയ ഭരണാധികാരി മറു വശത്ത്..
    നന്നായിട്ടുണ്ട് പ്രതികരണം
    ഓ.ടോ. പക്ഷെ.. ഇത് ഒരു ബ്ലോഗ് ആക്കാന്‍ ഞാന്‍ സജ്ജസ്റ്റ് ചെയ്യുന്നു..

    മറുപടിഇല്ലാതാക്കൂ
  3. 'താന്‍ താന്‍ നിരന്തരം ചെയ്യുന്ന കര്‍മ്മങ്ങള്‍
    താന്‍ താന്‍ അനുഭാവിച്ചീടുകെന്നേ വരൂ...'

    അമേരിക്കയുടെ കാര്യത്തിലായാലും ഇതു തന്നെ...

    മറുപടിഇല്ലാതാക്കൂ
  4. ആ ഒരു ദിവസത്തെ ഞാന്‍ സ്വാഗതം ചെയ്യും, കൊലവെറി പൂണ്ട് നടക്കുന്ന ആ നാടിന്റെ മേശക്കീഴില്‍ ഇട്ട് വീഴുന്ന അസ്ഥിക്ക് വെള്ളമിറ്റിച്ച് നില്ക്കുന്ന ഒരു നാട്ടിലാണ് ഞാന്‍ ജീവിക്കുന്നതെങ്കിലും. നാളെ അവന്റെ തോക്കില്‍ കുഴലിലെ വിനോദത്തിന് ഇരയാവാ‍നാണ് എന്ന് പോലും അറിയാതെ അവന് പ്രകീര്‍ത്തനം പാടുന്ന ലോകത്തിനാണെങ്കിലും.

    ഞാനും ആ ഒരു ദിവസം കാണാന്‍ ആഗ്രഹിക്കുന്നു.

    എഴുതി വച്ച ചരിത്രത്തിലൊന്നും ഒന്നും ശ്വാശ്വതമല്ല, ഈ വാഴ്ചയും അതാവില്ല, എനിക്ക് ശുഭപ്രതീക്ഷയുണ്ട്.

    -പാര്‍വതി.

    മറുപടിഇല്ലാതാക്കൂ
  5. ഒരു വന്‍ശക്തിക്കും ഒരു സ്വേച്ഛാധിപതിക്കും എന്നും ആയുസ്സുണ്ടായിട്ടില്ല. ചരിത്രം സാക്ഷി. കാലത്തിന്റെ തേരോട്ടത്തില്‍ ആഴ്ന്ന പോയ എത്ര അഹങ്കാരികള്‍.

    മറുപടിഇല്ലാതാക്കൂ
  6. അല്ലയോ,സ്വേച്ഛാധിപതീ

    യുദ്ധക്കളത്തില്‍ നിന്നുയരുന്ന
    കുഞ്ഞുങ്ങളുടെ നിലവിളികള്‍
    നിന്റെ ഉറക്കം കെടുത്താതിരിക്കില്ല.
    അവരെയോര്‍ത്ത്‌ കരയുന്ന
    അമ്മമാരുടെ മിഴിനീരില്‍
    നിന്റെ സിംഹാസനം
    ഒലിച്ചുപോകാതിരിക്കില്ല.
    അവര്‍ക്കുവേണ്ടി മിടിക്കുന്ന
    ലോകമനസ്സാക്ഷിയുടെ ഹൃദയത്തുടിപ്പുകള്‍
    നിന്റെ കോട്ടകളില്‍
    വിള്ളല്‍ വീഴ്താതിരിക്കില്ല.

    നീ അറിയുക;ഏകാധിപതികളായ
    നിന്റെ മുന്‍ഗാമികളാരും
    കാലത്തെ അതിജയിച്ചിട്ടില്ല തന്നെ.
    നിന്നെ കാത്തിരിക്കുന്നതും
    അനിവാര്യമായ പതനമത്രെ

    മറുപടിഇല്ലാതാക്കൂ
  7. ശക്തമായ പ്രതികരണം. ഞാന്‍ പൂര്‍ണ്ണമായി യോജിക്കുന്നു.

    മറുപടിഇല്ലാതാക്കൂ

Subscribe My Blog with Google Reader

ഇതു വായിച്ചിട്ടെന്തു തോന്നി? എന്തായാലും പറയൂന്നേ...